​अर्थमन्त्रीले औंलो ठड्याएर निजी क्षेत्रलाई धम्क्याउनुभयो : सांसद विश्वकर्मा

• Posted: Thursday, May 31, 2018 16:57 PM ( 3 years ago )

काठमाडौं, जेठ १७ – नेपाली कांग्रेसका सांसद मीनबहादुर विश्वकर्माले अर्थमन्त्रीले निजी क्षेत्रलाई धम्क्याउने काम गरेको आरोप लगाउनुभएको छ ।

प्रतिनिधिसभाको बिहीबारको बैठकमा सरकारको २०७५/७६ को विनियोजित बजेटमाथि धारणा राख्दै उहाँले निजी क्षेत्रलाई लगानीको लागि प्रोत्साहन गर्नुको सट्टा अर्थमन्त्रीले धम्क्याउने काम गरेको आरोप लगाउनुभएको हो ।

उहाँले बजेटमा निजी क्षेत्रलाई लगानीका लागि प्रोत्साहित नगरेर सहकारीलाई मात्र प्राथमिकता दिएका अर्थमन्त्रीले सार्वजनिक कार्यक्रममा औलो ठड्याएर ‘अब कुनै पनि व्यवसायीलाई मन परी गर्ने छुट छैन भन्दै धम्क्याएको आरोप लगाउनुभयो । उहाँले बजेट हावादारी भएको भन्दै कार्यान्वयन हुन नसक्ने ठोकुवा गर्दै सरकार आफै सिण्डिकेट खडा गर्न उद्धत रहेको रसुनको तस्करी मौलाउनुमा तात्कालिन सरकारको नीति जिम्मेवार रहेको दाबी गर्नुभयो ।

विश्वकर्माका अनुसार तीन तहको स्वायक्त सरकार निर्माण भइसकेको अवस्थामा ती सरकारलाई मातहतका निकाय ठानी मुस्किलले ३० प्रतिशत मात्रै बजेट मात्रै विनियोजन गरिनु संविधान र संघीयताको भावना विपरीत हो ।

बैठकमा बोल्दै विश्वकर्माले कमाउनेसँग प्रशस्त कर लिएर कमाउन नसक्नेलाई सामाजिक सुरक्षा मार्फत भत्ता वितरण गर्नु समाजवाद उन्मुख अर्थनीति हुने भन्दै र उत्पादनमा प्राथमिकता विनाको बाँड्ने नीतिले मुलुकको अर्थतन्त्र धरापमा परेको समाजवाद उन्मुख हुने टिप्पणी गर्नुभयो ।