स्पाइडरम्यान शैलीमा बालकको उद्धार गर्ने गसामाले फ्रान्सको नागरिकता पाउने

• Posted: Monday, May 28, 2018 17:46 PM ( 4 years ago )

जेठ १४ – पेरिसमा बार्दलीमा झुण्डिरहेको एक बालकलाइ उद्धार गरेर एकाएक प्रख्यात बनेका एक व्यक्तिले फ्रान्सको नागरिकता पाउने भएका छन् । 

मालीबाट बसाईं सरेर फ्रान्समा बस्दै आएका मेमाउदु गसामा नाम गरेका व्यक्ति आफ्नो घरको पारिपट्टिको भवनको चौथो तलाको बार्दलीमा झुण्डिरहेको ४ वर्षे बालकको उद्धारका लागि भवनको चाैथाे तलामा स्पाइडरम्यान झैँ झुण्डिँदै पुगेका थिए । उनलाइ झुण्डिँदै चौथो तलामा पुग्न १ मिनेटभन्दा कम समय लागेको थियो ।

उनी बार्दलीबाट बार्दलीमा झुण्डिँदै चौथो तलामा पुग्दा मानिसहरुले उनको कारनामा देखेर हौसलामा ताली बजाइरहेका थिए । गसामाको त्यो साहसिक भिडियो सामाजिक सञ्जालमा भाइरल भएको थियो । घटनापछि फ्रान्सका राष्ट्रपति इम्यानुयल म्याक्रोन ले गसामालाई सोमबार एलिजी प्यालेसमा बोलाएर धन्यवाद दिएका थिए । उनले बहादुरी पदक दिँदै वारुणयन्त्र सेवामा नोकरी गर्न प्रस्ताव समेत गरेका थिए ।

उनी हिँड्दै गर्दा उनले त्यो भवन अगाडि मान्छेहरुको भीड लागेको देखेका थिए । गसामाले म्याक्रोनलाइ भने, मसँग सोच्ने समय थिएन, ‘म उसलाई बचाउन सडकपारी दौडिएँ ।’

त्यस्तै पेरिसका मेयर यान हिडाल्गोले २२ वर्षे गसामाको बहादुरीको प्रशंसा गर्दै धन्यवादका लागि बोलाएको बताउनुभयो ।

भिडियाे हेर्न यहाँ क्लिक गर्नुहाेस्