कर्णाली प्रदेश बजेटमा भौतिक पूर्वाधार विकासलाई प्राथमिकता

• Posted: Monday, May 28, 2018 09:50 AM ( 3 years ago )

सुर्खेत, जेठ १४ – कर्णाली प्रदेश सरकारले आगमी आर्थिक वर्ष २०७५/०७६ का लागि बजेटको तयारी गरेको छ । आइतबार बसेको प्रदेश सभाको बैठकमा सरकारले पूर्व बजेटसम्बन्धी छलफलका लागि बजेटका सिद्धान्त, उद्देश्य, नीति तथा प्राथमिकता संसदमा पेश गरेको छ ।

आर्थिक मामिला तथा योजनामन्त्री प्रकाश ज्वालाले पूर्व बजेट छलफलका लागि विनियोजन विधेयक २०७५ पेश गर्दै बजेटमा भौतिक पूर्वाधार, कृषि, पर्यटन तथा उद्योग, जलस्रोत स्वास्थ्य र शिक्षामा प्राथमिकता दिएको बताउनुभयो । उहाँले प्रदेशमा सुरुङमार्ग, केबुलकारलगायतका पूर्वाधारमा सम्भाव्यता अध्ययनलाई पनि प्राथमिकता दिएको जानकारी दिनुभयो । 

प्रदेश सभाको बैठकमा बिशेष समय लिएर बोल्दै सांसदहरुले प्रदेश सरकारलाई प्रचारबाजी भन्दा पनि परिणामुखी काम गर्न ध्यानाकर्षण गराएका छन् । उनीहरुले सरकारले कार्यान्वयन नगरेको बताए । 

सांसद पदमबहादुर रोकायले आफूहरुले आफ्ना निर्वाचन क्षेत्र र जिल्लाका योजनाहरु प्रदेश सरकारलाई दिए पनि कार्यान्वयन नभएको बताउनुभयो । ‘प्रदेशका मन्त्रीहरुले सुविधा पाए तर जनताले केही पाएका छैन्न्’ उहाँले भन्नुभयो, ‘सरकारले अब योजना कार्यान्वयनमा जोड दिन जरुरी छ ।’