​सडक छैन, रेल र पानी जहाजको कुरा ! : डा. महत

• Posted: Saturday, May 26, 2018 19:11 PM ( 3 years ago )

खोटाङ, जेठ १२– नेपाली कांग्रेस नेता डाक्टर रामशरण महतले वर्तमान सरकारले रेल र पानी जहाजको कुरा गर्नुको सट्टा सडक नपुगेका ठाउँमा सडक बिस्तार गर्नुपर्ने बताउनु भएको छ ।

नेपाली कांग्रेस खोटाङ क्षेत्र नम्बर–१, ले शनिबार हलेसी तुवाचुङ नगरपालिकाको हलेसीमा आयोजना गरेको बृहत जागरणसभालाई सम्बोधन गर्दै पूर्व अर्थमन्त्री महतले सररकाले सुरुमा सडकले नछोएका ठाउँमा सडक बिस्तार गर्नुपर्ने बताउनु भएको हो ।

उहाँले सडक, विद्युत लगायतका पूर्वाधारको विकासपछि मात्र विकासको सम्भावना खुल्ने बताउनुभयो । ‘कमसेक सडक यातायात सबै ठाउँमा पु¥याऔं । त्यसपछि मात्र रेल र पानी जहाज पु¥याउँला’, महतले भन्नुभयो, ‘हावादारी कुरा गरेर मात्र हुँदैन । यथार्थवादी विकासको बाटो पहिल्याउनुपर्छ ।’ 

महतले देशको विकास र परिवर्तनका लागि वर्तमान सरकारको सही कदमलाई कांग्रेसले साथ दिने बताउनुभयो । पाँच वर्षका लागि बनेको सरकाले लोकतान्त्रिक आचारण देखाउन नसकेको महतको भनाई थियो । कार्यक्रममा पूर्व कृषि मन्त्री रामकृष्ण यादव, नेविसंघका पूर्व सभापति रञ्जित कर्ण लगायतको उपस्थिति थियो ।