कर्णाली प्रिमियर लिग : रुपन्देही ११ र त्रिभुवन आर्मी क्लब फाइनलमा

• Posted: Friday, May 25, 2018 20:35 PM ( 4 years ago )

सुर्खेत, जेठ ११ – रुपेन्देही ११ र त्रिभुवन आर्मी क्लब सुर्खेतको वीरेन्द्रनगरमा भैरहेको कर्णाली प्रिमियर लिग (केपीएल) को फाइनल प्रवेश गरेका छन् । 

वीरेन्द्रनगर रंगशालामा शुक्रबार भएको पहिलो सेमिफाइनलमा रुपन्देही ११ ले मध्यपश्चिम क्रिकेट क्लबलाई २६ रनले पराजित गर्‍यो । टस हारेर पहिले ब्याटिङ गरेको रुपन्देहीले ७ विकेट गुमाएर १७२ रनको योगफल तयार गरेको थियो । 

रुपन्देहीका लागि सन्दीप सुनारले ३० बलमा ७ चौका र २ छक्का प्रहार गर्दै सर्वाधिक ५० रन बनाए । त्यस्तै बशिर अहमदले १४ बलमा ५ छक्का प्रहार गर्दै ४६ रन जोडे । यसै क्रममा शंकर रानाले ३५ रन तथा निश्चल चौधरीले २२ रन  बनाए । 

रुपन्देहीको लागि सन्दीप सुनार र बिकाश श्रेष्ठले समान ३/३ विकेट तथा बिक्रम भुसालले २ विकेट हात पारे ।

१७३ रनको लक्ष्य पछ्याउने क्रममा मध्य–पश्चिमले १९.५ मा अल आउट हुँदै ओभरमा १४६ रन मात्रै बनाउन सक्यो । मध्य–पश्चिमका लागि कप्तान शुबेन्दु पाण्डेले सर्वाधिक ४६ रन, प्रनित थापाले २० रन तथा सिद्धान्त शाहीले १९ रन बनाए पनि जितको लागि पर्याप्त हुन सकेन ।
खेलको प्लेयर अफ द म्याच सन्दिप सुनार घोषित भए । 

शुक्रबार नै भएको दोश्रो सेमिफाइनल खेलमा त्रिभुवन आर्मी क्लबले धनगढी क्रिकेट एकेडेमीलाई ८ विकेटले पराजित गर्यो । 

टस जितेर ब्याटिङ गर्दै धनगढी क्रिकेट एकेडेमीले ८ विकेट गुमाएर १३१ रनको योगफल खडा गरेको थियो । धनगढीका लागि कप्तान भुवन कार्कीले ३२ बलमा ४ चौका र ३ छक्का प्रहार गर्दै अविजित ४४ रन बनाए । त्यस्तै सञ्जु दमाईले २३ रन, दिपेन्द्र थापाले २१ तथा रोमन बमले १६ रनको योगदान गरे । त्रिभुवन आर्मी क्लबका चन्द्र साउद र सगर पुनले समान २–२ विकेट लिए । 

१३२ रनको लक्ष्य त्रिभुवन आर्मीले १६.५ ओभरमा २ विकेट मात्र गुमाएर पुरा गर्यो । आर्मीका लागि खेलको प्लेयर अफ द म्याच समेत चुनिएका नरेश बुढाऐरले ३८ बलमा ६ चौका र ४ छक्का प्रहार गर्दै अविजित ६३ रन बनाए । त्यस्तै राजु रिजालले २८ रन बनाए भने  सागर पुनले १४ रन तथा अनिल मण्डलले १३ रन बनाए ।
कर्णाली प्रिमियर लिगको फाइनल खेल शनिबार हुनेछ ।