​निर्मलीको जन्मदिनमा मुला काटियो

• Posted: Tuesday, May 15, 2018 16:05 PM ( 4 years ago )

काठमाडौं, जेठ १ – अभिनेत्री निरु खड्काको आज ३५ औँ जन्मदिन परेको छ ।

बिक्रम सम्वत २०४० सालमा झापाको लखनपुरमा जन्मेकी निरुले कोरस नृत्यबाट कलाकारिताको सुरुवात गरेकी हुन् । उनले करिअरको सुरुवातमा सिनेमा ‘माइली’ मा समावेश भएको कति औँली अग्ली भएँ बोलको गीतमा नृत्य गरेकी थिइन् । त्यसपछि उनले कोरश डान्सर भएर लगातार २२ वटा जति सिनेमामा काम गरिन् । त्यसपछि भने उनले कलाकारितामा निरन्तरता दिन सकिनन् । 

पर्दामा २१ वर्षको उमेरमा नाच्न थालेकी निरुले त्यसको केही वर्षपछि टेलिश्रृङ्खला ‘थोरै भए पुगीसरी’मा अभिनेत्रीको रुपमा काम गर्ने मौका पाइन् । त्यसपछि उनले अर्को चर्चित टेलिश्रृङ्खला ‘तितो सत्य’मा पनि काम गरिन् । तर उनलाई चर्चित बनाउनमा भने टेलिसिरियल ‘मेरी बास्सै’को ठूलो भूमिका छ ।
‘मेरी बास्सै’मा गाउँले युवती निर्मलीको भूमिका निर्वाह गरेपछि उनलाई दर्शकले रुचाए । उनी यही एउटा भूमिकाबाट लोकप्रिय भइन् जसले अहिले पनि निरन्तरता पाएको छ । अहिले पनि उनी निर्मलीकै नामले परिचित छिन् । 

जन्मदिनमा मुला 

मंगलबार जन्मदिनमा गोकर्णमा एउटा विज्ञापनको छायाँकनमा रहेकी निरुले छायाँकनस्थलमा रमाइलो तरिकाले जन्मदिन मनाएकी छिन् । विज्ञापन निर्देशन गरिरहेका निर्देशक पवन केसीले मुला काटेर उनको जन्मदिनलाई रमाइलो बनाइदिएका हुन् । यो जन्मदिन अहिलेसम्मकै रमाइलो भएको निरुले बताइन् ।

एक वर्षको गहिरो प्रेमपछि बिहे

कलाकारको परिचय पाइसकेपछि बिक्रम सम्बत २०६७ सालमा निरुले नरोत्तम गौतमसँग प्रेम विवाह गरिन् । चार वर्षको चिनजान र एक वर्षको गहिरो प्रेमलाई विवाहमा परिणत गरेको निरु बताउँछिन् ।

नरोत्तम पेशाले व्यवसायी हुन् । निरु र नरोत्तम ७ वर्षकी छोरी र १६ महिनाका छोराका अभिभावक बनिसकेका छन् । चाख लाग्दो कुरा के छ भने निरु नरोत्तमभन्दा एक महिना जेठी छन् । सामान्यतयाः पुरुषभन्दा महिलाको उमेर कम हुनुपर्छ भन्ने हाम्रो सामाजिक मान्यता छ । तर निरुको सन्दर्भमा भने यो लागू भएको छैन । एक महिना जेठी भए पनि निरु नरोत्तमसँगै हुँदा जेठी जस्तो भने देखिन्नन् । 

उज्यालाे र गफगाफ डटकमकाे सहकार्यमा