भोलिसम्म देशभरको मौसम यस्तै हुने, अब ट्वीटरबाटै मौसम अपडेट

• Posted: Monday, May 14, 2018 10:39 AM ( 4 years ago )

काठमाडौं, वैशाख ३१ – उपत्यकासहित देशका धेरै ठाउँमा रातिदेखि नै झरी परेको छ । आज बेलुकीसम्म देशभरको मौसम बद्ली हुने मौसमविद्को अनुमान छ । वायू मण्डलको तल्लो सतहमा बंगालको खाडीबाट आएको जलवाष्पयुक्त हावा तथा पश्चिमीको वायुको प्रभावसँगै पूर्वी क्षेत्रबाट आएको हावाका कारण प्रि मनसुन सक्रिय हुँदा झरी परेको मौसमविद् मिनप्रसाद अर्यालले बताउनुभयो ।

दिउँसो केहिबेर मौसम खुले पनि फेरि बदली भई पानी पर्ने सम्भावना छ ।  मौसमविद् अर्यालका अनुसार मंगलबार पनि मौसम यस्तै रहने छ । मंगलबार बेलुकीदेखि भने पानी पर्न रोकिने अनुमान गरिएको छ । तर प्रि मनसुनको समय भएकाले स्थानीय वायूको प्रभावले पनि पानी पार्न सक्ने मौसमविद्ले बताएका छन् ।

अब ट्वीटरबाट पनि मौसम अपडेट

जल तथा मौसम पूर्वानुमान महाशाखाले अब सामाजिक सञ्जालमार्फत पनि मौसमसम्बन्धी जानकारी दिने भएको छ । सामाजिक सञ्जाल ट्वीटरमार्फत इन्टरनेट चलाउनेहरुले मौसमी जानकारी लिन सक्नेछन् । @DHM_Weather मा गएर मौसमबारे जानकारी लिन सकिने महाशाखाले जनाएको छ ।