कुकुरको स्थायी बन्ध्याकरण सुरु

• Posted: Monday, May 07, 2018 18:25 PM ( 4 years ago )

हरि हुमागाईं/उज्यालो ।

मकवानपुर, वैशाख २४ – हेटौंडामा कुकुरको संख्यामा अत्यधिक वृद्धि भएपछि कुकुरकै स्थायी बन्ध्याकरण गर्न थालिएको छ ।

कुकुरको संख्यामा वृद्धि हुन नदिनका लागि बन्ध्याकरणका लागि कुकुरको पोथी र भालेसहितलाई राखेर एक हस्तासम्मको लामो शिविर सोमबारबाट हेटौंडामा सुरु भएको हो । हेटौंडा उपमहानगरपालिकाको आयोजना तथा पेट्स होम धरान, हार्ट पोखरा र जिल्ला पशुसेवा कार्यालय मकवानपुरको प्राविधिक सहयोगमा छाडा रुपमा छोडिएका कुकुरको बन्ध्याकरण गर्न सुरु गरिएको हो ।

शिविरको उद्घाटन गर्दै हेटौंडा उप–महानगरपालिकाका मेयर हरिबहादुर महतले घरमा पालिएका भन्दा पनि बाहिर छोडिएका कुकुरहरुको संख्या धेरै बढ्दै गएकोले बन्ध्याकरण गर्न सुरु गरिएको बताउनुभयो ।

भाले र पोथी कुकुरको स्थायी बन्ध्याकरण गरेपछि सडकमा बाहिर छाडा छा्डिएका कुकुरहरुको संख्या वृद्धि हुनबाट रोकिने भएकाले यो विधि अपनाइएको मेयर महतले बताउनुभयो । कुकुरलाई जम्मा गरेर पूरै बेहोस बनाएर मानिषलाई जस्तै गरी सबै विधि पु¥याएर ६ जना पशु डाक्टरको सक्रियतामा बन्ध्याकरण गर्न लागिएको हो ।

सोमबार मात्र ४० वटा पोथी र भाले कुकुरको स्थायी बन्ध्याकरण गरेर जहाँबाट उठाएर ल्याइएको हो त्यही लगेर छोडिएको उप–महानगरपालिकाले जनाएको छ । कुकुरलाई बन्ध्याकरण गर्नुका साथै रेबिज खोप समेत लगाएर छोडिएको छ ।

शिविरमा भाले कुकुरको अण्डकोष निकाल्ने र पोथी कुकुरको पाठेघर निकालेर फालिएको पेचहोमका संचालक शंकुकर्ण श्रेष्ठले बताउनुभयो । हेटौंडाको समुदायस्तरमा हिँड्डुल गर्ने छाडा प्रकृतिका कुकुरलाई नियन्त्रणमा लिएर शिविरमा ल्याइएको हो ।

स्थायी बन्ध्याकरण गरेका सबै कुकुरहरुलाई गलामा रातो बेल्ड लगाएर छोडिएको छ । यी कुकुरहरुबाट अरु बच्चा नजन्मने र रेबिज रोग पनि नलाग्ने पशु चिकित्सकहरु बताउँछन् । कुकुरको स्थायी बन्ध्याकरण शिविर वैशाख ३० गतेसम्म हेटौंडाको पशुसेवा कार्यालयको हाताभित्रमा सञ्चालन हुने छ । 

कुकुरलाई विष खुवाएर गएको वर्षहरुमा उप–महानगरपालिकाले मार्ने गरे पनि यस वर्ष पशु अधिकारको रक्षा गर्दै कुकुरलाई पनि बन्ध्याकरण गर्न लागिएको हो ।