​प्रतिनिधिसभामा चारवटा अध्यादेश प्रस्तुत

• Posted: Sunday, May 06, 2018 19:46 PM ( 4 years ago )

काठमाडौँ, वैशाख २३ – प्रतिनिधिसभामा चारवटा अध्यादेश प्रस्तुत गरिएको छ ।

आजदेखि शुरु भएको संघीय संसदको दोस्रो अधिवेशनको बैठकमा शिक्षा, राष्ट्रिय चिकित्सा शिक्षा अध्यादेश, २०७५  राष्ट्रियसभा सदस्य निर्वाचन अध्यादेश, २०७५, बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग पहिलो संशोधन अध्यादेश, २०७५ र संघीय संसदका महासचिव, प्रतिनिधिसभाका सचिव र राष्ट्रियसभाका सचिवको पारिश्रमिक, सेवाको शर्त र सुविधासम्बन्धी अध्यादेश, २०७५ पेश गरिएको हो । 

बैठकमा प्रतिनिधिसभा नियमावली मस्यौदा पनि पेश गरिएको छ । समितिका सभापति कृष्णभक्त पोखरेलले ‘प्रतिनिधिसभा नियमावली समितिको प्रतिवेदन, २०७५’ प्रस्तुत गर्नुभएको हो । समितिको बैठकबाट शनिबार अनुमोदन भएको प्रतिवेदन आइतबार संसदमा पेश भएको हो । 

सभापति पोखरेलले राख्नुभएको नियमावली मस्यौदा समितिको म्याद थपसम्बन्धी प्रस्ताव पारित भएको छ । संसद बैठकले सभामुख र उपभामुखको अनुपस्थितिमा बैठक सञ्चालनका लागि अध्यक्षता गर्न खगराज अधिकारीको सट्टामा राधा ज्ञवालीलाई राख्ने प्रस्ताव पारित गरेको छ ।