​सांसदलाई फौजदारी अभियोग लागे निलम्बन नहुने तर सांसदको काम गर्न नपाउने

• Posted: Saturday, May 05, 2018 19:19 PM ( 4 years ago )

काठमाडौं, वैशाख २२ – अदालतले अभियोग पुष्टि नगरेसम्म सांसदलाई फौजदारी अभियोग लागे पद निलम्बन नहुने भएको छ ।

प्रतिनिधिसभा नियमावली मस्यौदा समितिमा शनिबार जुटेको सहमति अनुसार फौजदारी अभियोग लागेका सांसदको पद अदालतले अभियोग पुष्टि नगर्दासम्म निलम्बन हुने छैन । लामो विवाद रहेको यो विषयमा सहमति गर्दै समितिले पद निलम्बन नभएपनि फौजदारी अभियोग लागेका सांसदले सांसदको हैसियतमा कामकारबाही गर्न नपाउने र तलबभत्ता रोक्का गर्ने मस्यौदा तयार पारिएको हो ।

सिंहदरबारमा बसेको समितिको बैठकले यो विषयमा टुंगो लगाएको समितिका सभापति कृष्णभक्त पोखरेलले जानकारी दिनुभयो । यो विषयमा कांग्रेस र मधेश केन्द्रित दलले निलम्बन गर्न नहुने अडान राखेका थिए भने एमालेले त्यसको विरोध गरेको थियो तर समितिको शनिबारको बैठकमा भने सवै दलका सांसद फौजदारी अभियोग लागेका सांसदको पद तत्काल निलम्बन नगर्ने भन्नेमा सहमत भएका हुन् ।

निलम्बन भन्ने शब्द नरहेपनि तलवभत्ता रोक्का गर्ने तथा सांसदका हैसियतमा काम नगर्ने भन्नु नै निलम्बन भएको समितिका सदस्यहरुको जिकिर छ । संविधानसभा र रुपान्तरित संसदमा फौजदारी अभियोग लाग्नासाथ पद निलम्बन हुने प्रावधान थियो । त्यसै अनुसार श्यामसुन्दर गुप्ता, सञ्जय साह, ल्ह्यारक्याल लामा, डोलबहादुर कार्कीको पद फौजदारी अभियोग लाग्नासाथ निलम्बनमा परेको थियो । 

अभियोग प्रमाणित भएर कैदमा बसेका सांसद भने स्वतः निलम्बित हुने व्यवस्था मस्यौदामा गरिएको छ । प्रतिनिधिसभा अन्तरगतका समिति संख्याको बारेमा भने समितिले सहमति गर्न सकेन । मुख्य विपक्षी दल नेपाली कांग्रेसले फरक मत राखेकाले फरक मतसहितको प्रतिवेदन प्रतिनिधिसभा बैठकमा पठाउने तयारी रहेको समितिले जनाएको छ ।

समितिमा बहुमतबाट संसदमा १० वटा समिति रहने प्रस्ताव पारित गरिएको छ । कांग्रेसले भने थोरैमात्र समिति राख्नुपर्ने माग गर्दै आएको छ ।
यो मस्यौदा आइतबार शुरु हुने संसदमा पेश गरिने समितिले जनाएको छ ।