के आज पाकिस्तानी प्रधानमन्त्री नेपाल आउने कुरा साँचो हो ?

• Posted: Thursday, May 03, 2018 17:10 PM ( 4 years ago )

काठमाडौं, वैशाख २० – ‘दुई दिने नेपाल भ्रमणका लागि प्रधानमन्त्री शाहिद खक्कान अब्बासी आज नेपाल प्रस्थान गर्दै ।’ 

यो खबर हो पाकिस्तान सरकारको आधिकारिक ट्विटर ह्याण्डल गभर्मेन्ट अफ् पाकिस्तानबाट गरिएको ट्वीटको । व्यापार, शिक्षा,पर्यटनलगायतका द्वीपक्षीय सम्बन्ध अझ विस्तारित र सुदृढ बनाउन पाकिस्तानी प्रधानमन्त्री नेपाल भ्रमणमा जान लागेको कुरा ट्वीटमा उल्लेख गरिएकाे छ । 

गएको फागुन २१ गते मात्रै दुई दिने नेपालको औपचारिक भ्रमणमा आएका पाकिस्तानी प्रधानमन्त्री अब्बासी फेरि नेपाल आउन लागेको खबरले सबैलाई आश्चर्यचकित पार्ने नै भयो । 

पाकिस्तानी सरकारको ट्वीटर ह्याण्डलबाट आज मात्रै साउदी अरबका उर्जामन्त्रीसँग प्रधानमन्त्री अब्बासीको इस्लामाबादमा भएको भेटवार्तालगायत थुप्रै पोस्ट भएका छन् । त्यसैले ट्वीट पोस्ट गर्ने क्रममा पुरानै ट्वीट रिपोस्ट भएको हुन सक्ने काठमाडौंमा रहेको पाकिस्तानी राजदूतावासले जनाएको छ । 

यो ट्वीट पुरानै ट्वीट रिपोस्ट भएको हो भन्न किन पनि सकिन्छ भने यदि पाकिस्तानी प्रधानमन्त्री अब्बासीको दुई दिने भ्रमणमा नेपाल आउन लागेको भए नेपाललाई जानकारी हुनैपथ्र्यो ।

परराष्ट्र मन्त्रालयका प्रवक्ता भरतराज पौडेलले पाकिस्तानी प्रधानमन्त्री नेपाल आउने कुरा सत्य नभएको बताउनुभयो ।