​भागबण्डा नमिलेर पार्टी एकता गर्न नसक्ने, अनि चलखेल भयो भनेर रडाको मच्चाउने : गगन थापा

• Posted: Wednesday, May 02, 2018 13:55 PM ( 4 years ago )

रुपन्देही, वैशाख १९ – नेपाली कांग्रेसका केन्द्रीय सदस्य तथा पूर्व मन्त्री गगन थापाले एमाले र माओवादीसँग कम्युनिष्ट चरित्र नै नभएको बताउनु भएको छ । 

नेपाली कांग्रेस बुटवल उपमहानगर समितिले बुधबार बुटवलमा आयोजना गरेको कार्यक्रममा बोल्दै उहाँले ‘एजेण्डा, संकल्प र कार्यक्रमका हिसावले वतर्मान गठबन्धन कम्युनिष्ट नामको अवसरवादी गठबन्धन’ भएको बताउनु भएको छ ।

सरकार फरक मतप्रति असहिष्णु बन्दै गएको बताउदै उहाँले अधिनायकवादी सोच बेलैमा नत्यागे ओली सरकारका लागि प्रत्यूदपादक हुने बताउनुभयो । सरकार संकल्पबाट बरालिन खोजे कांग्रेसले सही ट्रयाकमा ल्याउने उहाँको भनाई छ । थापाले  वाम एकताप्रति लक्षित गर्दै भन्नुभयो, ‘पदको बाँडफाड नमिलेर पार्टी एकता गर्न नसक्ने अनि विदेशी चलखेल भयो भनेर रडाको मच्चाउनु एमाले र माओवादीका लागि लाजमर्दो कुरा हो ।’

एमालेजस्तो अराजक प्रतिपक्ष कांग्रेस कहिल्यै नबन्ने बताएका पूर्वमन्त्री थापाले कांग्रेसको संसदमा भूमिका सधैँ जिम्मेवार प्रतिपक्षको रहने बताउनुभयो । मतका हिसावले कांग्रेस प्रतिपक्ष भए पनि संविधान कार्यन्वयनको सन्र्दभमा अगुवा रहेको उहाको भनाई छ ।

केन्द्र , प्रदेश र स्थानीय सरकारकाबीच द्वन्द्व बढ्न थालेको भन्दै केन्द्रीय सदस्य थापाले यसले सरकार संविधान कार्यान्वयनप्रति उदासिन छ भन्ने प्रष्ट देखिएको बताउनुभयो ।