​६९ लागे मदनकृष्ण, यो वर्ष काटिने छैन केक

• Posted: Wednesday, Apr 18, 2018 18:59 PM ( 4 years ago )

काठमाडौं, वैशाख ४ – तिथिअनुसार हाँस्यकलाकार मदनकृष्ण श्रेष्ठको आज जन्मदिन परेको छ ।

विक्रम सम्वत २००७ सालमा अक्षय तृतियाको दिन काठमाडाैंको जितपुर फेदीमा उनको जन्म भएको हो । उनको वास्तविक जन्मदिन भने वैशाख ७ गते हो  । तर उनले तिथिअनुसार पनि जन्मदिन मनाउने भएका हिसाबले उनको जन्मदिन आज परेको छ ।

वर्षमा दुई पटक जन्मदिन मनाउँदै आएका मदनले यो वर्ष भने जन्मदिन मनाउने छैनन् । गएको चैत्र २० गते उनकी श्रीमती यशोदाको निधन भएका कारण उनले यो वर्ष जन्मदिन नमनाउने भएका हुन् । गएको वर्ष उनले आफूले यशोदासँग विवाह गरेकै मन्दिरमा जन्मदिनको केक काटेका थिए । 

बाल्यकाल

बुवा रामकृष्णलाल श्रेष्ठ र आमा लक्ष्मीदेवी श्रेष्ठका  छोरा मदनले जन्मेको ६ महिनामै आमालाई गुमाए । मदनका बुवा गाउँका प्रधानपञ्च थिए । जन्मेको ६ महिनामै आमा गुमाएका मदनकृष्ण फूपु र बुवाको काखमा हुर्केका हुन् ।

आफ्नो बाल्यकाल सम्झँदै उनी भन्छन्, ‘बाल्यकालमा म अलि अल्लारे, चकचके थिएँ । के गर्नु हुन्छ के गर्नु हुँदैन भन्ने कुराको जानकारी थिएन । मनमा लागेको कुरा फ्याट्ट गरिन्थ्यो । आफ्नो कारणले कोही हाँस्यो भने एकदमै खुशी लाग्थ्यो । त्यो समयमा कलाकारितामा लाग्छु भनेर खासै लागेको थिएन । तर आफ्नो कारणले कोही रमाएको देख्दा खुशी लाग्थ्यो ।’ 

मदनकृष्ण आफ्नो बाल्यकाल सम्झँदै भन्छन्, ‘पहिलेदेखि नै कार्यक्रमहरुमा भाग लिने गर्थेँ । स्टेजमा गएर बोल्नेबित्तिकै मानिसहरु हाँस्न थाल्थे । मैलै त क्यारिकेचर गर्नै पर्दैनथ्यो । अहिलेसम्म पनि हँसाउन जानेको छु जस्तो त लाग्दैन मलाई तै पनि मानिसहरु हाँस्छन् ।’

बाल्यकालमा उनका संगीतमा रुचि थियो । उनले विक्रम सम्वत २०२२ सालमा पहिलो पटक रेडियो नेपालमा गीत रेकर्ड गराएका थिए ।

कलाकारिताको सुरुवात

आफ्नो कलाकारिताको सुरुवात सम्झदै उनले भने, ‘सानैदेखि कलाकार  हुने लक्षण त ममा थियो ।

तर मलाई कलाकारितामा आउँछु जस्तो भने लागेको थिएन ।  कलाकारिताको सुरुवातमा मैले संगीत सिकेको थिएँ ।  तर कलाकार हुने भनेर अन्य कक्षाहरु भने  लिइनँ ।  रहरले संगीत सिक्न थालेको तर त्यसलाई लामो समय निरन्तरता दिनभने सकिनँ । एउटा राग सिकेर त्यसलाई निरन्तरता दिन सकिनँ ।

त्यसबखत हजुरबुवा बित्नु भयो अनि यत्तिकै भयो । अरु कलाकारिता भने दिन बित्दै जाँदा सिकियो । पहिले–पहिले त सित्तैमा दर्शक हँसाउन काम धेरै वर्ष गरियो । तर पछि हरिवंशसँग सहकार्य गरेको केही समयपछि पारिश्रमिक सहितहामीले कामगर्न थाल्यौँ । २०३८ सालमा मैले अरुलाई हँसाएर पारिश्रमिक पाएको थिएँ । यसमा म एक्लै थिइना हरि पनि थियो ।

त्यसपछिका दिनहरुमा भने हामी दुईको सहकार्य राम्रो हुँदै गयो आर्थिक रुपमा पनि हामी बलियो हुनथाल्यौँ । हाम्रो पहिलो कमाई ५०० रुपैयाँ थियो । यसलाई हामीले आधाआधा बाँडेर लियौँ । यस हिसाबले कलाकारितामा लागेपछि मेरो पहिलो कमाई साढे दुई सय रुपैयाँ हो ।’

हाँस्यव्यग्यका जन्मदाता

मदनकृष्ण श्रेष्ठ नेपाली हाँस्यव्यङग्य क्षेत्रका त्यस्ताकलाकार हुन् जसले नेपालमा हाँस्यव्यङग्यको विकास गर्न र यसलाई सहज बनाउन ठूलो योगदान पुर्याएको छ । मदनकृष्णलाई नेपाली हाँस्यव्यङग्यका पिता पनि भनिन्छ ।

नेपालमा राजनीतिक व्यङग्य गर्न निकै कठिन भएको समयमा मदनकृष्णले हरिवंश आचार्यसँग मिलेर हाँस्यव्यङग्यको सुरुवात गरेका थिए । उनीहरुले निरन्तर गरेको मेहनतको फलले नै अहिले नेपाली हाँस्यव्यङग्य यति फस्टाएको हो भनिन्छ ।

मदनकृष्ण र हरिवंशले राजाको शासनकालमा सरकारको डरैडरैमा पनि कमेडी गर्न थालेका थिए । उनीहरुले पहिले अफिसको हाकिम त्यसपछि कार्यालयको सचिवमाथि व्यङग्य प्रहार गर्न थाले । पछिपछि उनीहरुको व्यङग्य राजदरबारका सचिवसम्म पुग्न थालेको थियो ।  पछि भने उनीहरु राज्यको व्यवस्थालाई नै भन्न सक्ने भएका थिए ।

–उज्यालाे र गफगाफ डट कमकाे सहकार्य